Տարիներ առաջ իմ հեղինակային «Հին ընկերների ակումբ» հաղորդաշարի հյուրերն էին երջանկահիշատակ Երվանդ Մանարյանը, Տիկնիկային թատրոնի գեղարվեստական ղեկավար Ռուբեն Բաբայանը: Բաբայանը մի պատմություն պատմեց՝ նախապես ներողություն խնդրելով վարպետից և հեռուստադիտողներից:
-Վարպետը,-ասաց Ռուբեն Բաբայանը,- ինձ համար զուսպ ու հանգիստ մարդու օրինակ է միշտ եղել: Մեկ շաբաթ առաջ էր: Քայլում էինք, դիմացից մշակութային մի գործիչ էր գալիս, ով օրեր առաջ, պարզապես, վայրահաչել էր թատրոնի, տիկնիկների գաղափարի ու դերասանների հասցեին: Վարպետը, ձեռքի իրերը տվեց ինձ, թե՝ բռնիր, հիմա կգամ: Սուսուփուս մոտեցավ այդ մարդուն ու հենց փողոցում մի շռնդալից ապտակ հասցրեց՝ միաժամանակ բարձրաձայնելով «սրիկա»: Հետո մոտացավ ինձ, վերցրեց ձեռքի իրերն ու թե՝ գնանք, Ռուբեն ջան: Մնացի ապշած: Ասաց. «Ինչ ուզում է լինի, այդ սրիկային մեկ ապտակ չէի կարող չհասցնել»:
Վարպետն ու Ալեն Սիմոնյանը թե՛ տարիքային, թե՛ քաշային, թե՛ իմաստության հարցերում տարբեր հարթակներում են, իհարկե, բայց Արթուր Դանիելյանին, մեզանից յուրաքանչյուրն, իր մտքում, մեկ ապտակ տալու ցանկություն ունեցել է՝ երևի թե: Պատճառները շատ են՝ համացանցով հայհոյելու, տարիներ շարունակ փեսա Միշիկի կամ Ռոբերտ Քոչարյանի հանցավոր գործիքը դառնալու համար: Վստահ եմ՝ քթի տակ մի հայհոյանք մռթմռթացել է, և Ալեն Սիմոնյանը մռութին հասցրել է: Ես Ալեն Սիմոնյանին մեկ կամ երկու անգամ գլխով բարևած հազիվ լինեմ, բայց, կներեք, լավ է արել, վաստակած ապտակ էր: Հուսով եմ՝ «սրիկա» բառն էլ է օգտագործել: Եթե այդ արարքի համար մի 15-օրյա կամ երկու ամսվա կալանքի ենթարկվի, պատրաստ եմ, իմ համեստ հնարավորություններով, Ալենի «տուլիկ»-ի հարցերը բանտում կարգավորել: Համ էլ՝ ինձ ու շատերին փրկեց հետագա գլխացավանքից:
Ես, տարիներ շարունակ, սուր քննադատության եմ ենթարկել ՀՀ նախկին իշխանություններին՝ մտահոգվելով մեր երկրի ապագայով, բարձրաձայնելով նրանց վարած ապաշնորհ ու անօրինական գործունեության մասին, բայց երբեք ինձ թույլ չեմ տվել, հրապարակային քննադատություններում, մայր, կին կամ երեխա հայհոյել: Ավելին, օրինակ, բազմաթիվ ՀՀԿ-ական գործիչների վերաբերյալ, հարկ եղած դեպքում, օբյեկտիվ գնահատական եմ հնչեցրել՝ չուրանալով ու չկեղծելով ճշմարտությունը: Արթուր Դանիելյանին ու իր նմաններին նույնիսկ ընդդիմություն որակելն է մեղք, որովհետև նրանց հայհոյանքն ու ընդվզումն, անգամ, պատվերով է, փողով…Ու վե՛րջ…
Իսկ լուրջ վերլուծությունների ու ռեպորտաժների համար բազմաթիվ կարևոր և հրատապ խնդիրներ կան:
Սուրեն Սարգսյան