Շնորհավորում եմ. թող ձեր զավակները երբեք չամաչեն ձեզ համար


Լուսանկարը՝ armtimes.com կայքից

Նիկոլ Փաշինյանը կոչումների է արժանացրել ուժային կառույցների ղեկավարներին և ոչ միայն: Նրանցից շատերին անձամբ չեմ ճանաչում, սակայն մարդու մասին դատողություններ անելու համար, պետք է նախ գնահատել արած գործերը: Թե՛ Վանեցյանը, թե՛ Սասուն Խաչատրյանը և թե՛ Արթուր Դավթյանը օրեցօր, ժամ առ ժամ, րոպե առ րոպե վաստակել են այսօրվա կոչումը: Վալերի Օսիպյանին անձամբ եմ ճանաչում: Դեռ նախկին իշխանությունների օրոք, երբ վերջինս ՊՊԾ ղեկավար էր, ես էլ՝ Դաշտային հրամանատարների խորհրդի անդամներից մեկը, բազմիցս շփվել ենք:

Հերթական անգամ, երբ իշխանությունները, Աբովյան փողոցում, նախապես  վարձակալած դահլիճը վերջին պահին հրահանգեցին, որ մենք՝ ազատամարտիկներով չկարողանանք օգտագործել, մեր ջղերը չդիմացան, ասացինք՝ հիմա փակելու ենք Աբովյան փողոցը: Օսիպյանը, դիմելով ինձ, թե՝ պարոն Սարգսյան, ձեզ կլսեն, խնդրում եմ, մի արեք… Ասացի՝ դուք ինչ խնդիր ունեք, մենք փողոցը կփակենք, դուք մեզ, հանգիստ խղճով, հատիկ-հատիկ ձեռուոտ արեք, շպրտեք ոստիկանական մեքենաների բեռնախցիկներն ու տարեք պատժելու: Օսիպյանի հայացքում վիրավորանքից հուզմունք նկատեցի: Եթե չամաչեր, անզորությունից գուցե արտասվեր:

-Ախր, ես այդպիսի հրաման ոնց տամ, պարո՛ն Սարգսյան:

 Ասացի՝ բա լավ, մենք՝ տղերքով, մեր ողջ գիտակից կյանքը նվիրել ենք Հայաստանի անկախության կերտմանը, որ մի դահլիճ էլ իրավունք չունենա՞նք զբաղեցնելու ու մեր մտքերը բարձրաձայնելու, բա մենք ո՞վ ենք… հանգիստ խղճով ձերբակալեք, մի ազդվեք, մենք ոչ ոք ենք: Խեղճացավ Վալերի Օսիպյանը.

-Մի՛ արեք, խնդրում եմ,-կրկնեց: Օսիպյանի «խեղճությունը» ինձ թևաթափ արեց, դա ոչ թե թույլի, այլ հարգանք ունեցող մարդու պահվածք էր:

Տղերքի հետ խորհրդակցեցի, ասացինք, որ էդպես է՝ գնում ենք Մելիք Ադամյան՝ ՀՀԿ գրասենյակի դիմացը մեր ասելիքն ասենք:

Ժամանակին Օսիպյանի անձնական համարն ունեի, հիմա այդ համարն այլևս չի գործում, ուզում էի շնորհավորել…

 Այսպես՝ բոլորի կոչումները շնորհավորում եմ: Հիշե՛ք, հանուն Հայաստանի Հանրապետության ծառայելը մեծ պատիվ է: Ոստիկանը, ԱԱԾ պետը, դատախազը, ՀՔԾ պետն ու մնացած բոլոր պետերը պիտի ստանան բարձր աշխատավարձ, աշխատեն անիծվածի պես և հպարտ լինեն՝ իրենց անձնուրաց ծառայության համար, և իրենց զավակներն էլ հետագայում հպարտ կապրեն…

Ձեր զավակներին հպարտ ապրել եմ մաղթում: Թող նրանք երբեք չամաչեն ձեզ համար…

Հ.Գ. Որ սեղան գցեք, հրավիրեք, մեկ բաժակ կբարձրացնեմ ու ավելի մանրամասն կասեմ… Հարգանքներիս հավաստիքը…

Սուրեն Սարգսյան

Добавить комментарий